عجز القصيد وعجزت العين تبكيك =ياغالي روّح عصر يوم الإثنين
الله يبيحك كلما حل طاريك=ماظنتي نسلى ولا أظن ناسين
ياعزوتي .. [ يابوي ] .. وين العوض فيك=لو هو يعنّا له ترجلت هالحين
صاحت عيوني بعالي الصوت تنعيك=مبطين عن شوفة كحيلان مبطين
مابين صدق وكذب بعيون مغليك=أيممك والدمع في محجر العين
يافلان لآ مريت الله يخليك=سلم على راعي القبر لي سلامين
يامن خصال الحلم متجمعه فيك=ماتزعلك كلمه ولو هي سكاكين
حزني مثل طـفل مدلل ولع فيك=عنده .. [ يبه ] .. يسوى كثير الملايين
والله لو أرثيك ,, وأرثيك ,, وأرثيك=ماخففت حزني مثل دمعة العين