بالله إرجع شوف وجـه المدينـه = تبكي شوارعها من اسباب فرقـاك
حتى المباني من فراقـك حزينـه ^^ الريح صوت ونبرة الحزن شبـاك
والليل بيـح فـي غيابـك حنينـه ^^ ينشد نجومه وين طلعـت محيـاك
برد . وظلام . ودمعته وسط عينه ^^ راح يتلمس فـي زوايـاه يمنـاك
كنه طفل غاب الفرح عـن سنينـه ^^ يشتاق لك ويحن لـك ويترجـاك
والشمس تطلع تسأل الليـل وينـه ^^ تقطع خيوط الليل من شان تلقـاك
تاقف وتمشي كنهـا لـك رهينـه ^^ تمشي وتاقف في سماهـا تحـراك
ياصاحبـي صاحبـك الله يعينـه ^^ محداً عرف وشلون حالـه بليـاك
عزيز نفس ولارضـى بالغبينـه ^^ البعد يغبن والغبن كيـف ينسـاك
من زود حبك صرت دمعه بعينـه ^^ يخاف لاتنـزل رجولـه توطـاك
حال الفراق المـر بينـك وبينـه ^^ يرمى حبال الوصل يمك ولا جاك
شاعر صدى حرفه يترجـم انينـه ^^ يموت حيٍ لافقـد مثـل شـرواك
هاذا أنـا وجـروح قلبـي دفينـه ^^ تعال داو جروح بعـدك بلامـاك
هاذا أنا ودمـوع عينـي سجينـه ^^ هاذا أنـا ياصاحبـي لاعدمنـاك
إرجع بدونك بيض الأيـام شينـه ^^ ياخي حرام إ رجع ترى الكل يبغاك
بالله إ رجع ضاق صـدر المدينـه ^^ تبكي مبانيها من أسبـاب فرقـاك