الورد تكمل ريحته بالنواوير = والعين شوف الزين غايت مناها
وانا ثمان سنين طارت كما الطير = راحت وانا راحت حياتي معاها
ودي بشوف الزين لكن تياسير = واوجست بان العين جاها عماها
الين شفت اللي تفوق الغنادير = في وصفها ضاع الكلام ولقاها
لو اعلنوا مسابقة للجماهير = وجابولهم لجنه تقيم مداها
وصارت على التلفاز عرض وطوابير = كلاً تجي وتجيب ما الله عطاها
الاوله والاوله بالحلاء غير = لكن نشوف اللي تجي من وراها
الثانية وصفه يخون التعابير = فيها الجمال اليوسفي قد غشاها
لا ناظرت طاحوا رجال مناعير = وان سلهمت ياطيبها ياشقاها
تاقف ولا قصده تغيض المشاهير = تمشي متر لاشك تقصر خطاها
شوفه يضيع ولا لقينا تفاسير = حتى الطبيب اللي فحصها تباها
قال النظر صافي ومني تباشير = سته على سته ولكن بلاها
الجفن وده يفتح العين وتسير = ومن ثقل رمش عيونها ما قواها
هذي هي الاسباب حسب التقارير = لحداًً يقول ان العمى هو بلاها
سبحان منهو صور الزين تصوير = لو انها للعين ماهي دواها
هذي وصوف الثانية يامسى خير = ويني وين الاوله من حلاها